HEIÐURSFÉLAGAR FÍT
Þrettán félagar hafa verið útnefndir heiðursfélagar frá stofnun FÍT árið 1953. Stjórn félagsins leggur tillögur að heiðursfélögum fyrir aðalfund, en heiðursfélagar geta þeir orðið sem hafa lagt málefnum félagsins og teiknara í heild umtalsvert lið með störfum sínum.
 

Atli Már Árnason
var fæddur í Reykjavík. Hann fór árið 1937 til Kaupmannahafnar í Kunsthåndværkerskolen og lauk þaðan prófi í auglýsingateiknun 1940. Að námi loknu vann hann á Auglýsingastofu KRON en stofnaði eigin auglýsingastofu 1948 ásamt Ásgeiri Júlíussyni (einnig stofnfélagi í FÍT), sem hann rak í áratugi. Atli Már kenndi fríhendisteikningu og fagteikningu bóka-
gerðarmanna um skeið við Iðnskólann í Reykjavík. Eftir hann liggur mikið starf á sviði grafískrar hönnunar.
Atli Már fékkst frá upphafi starfsferils síns sem teiknara jafnframt við að mála.
Hann sneri sér nær alfarið að listmálun tæplega fimmtugur að aldri og vann að list sinni
til dauðadags.


Friðrika Gunnlaug Geirsdóttir
var í stjórn Félags íslenskra teiknara og félagsins Íslensk grafík. Að loknu stúdentsprófi nam hún í Danmörku þar sem hún lauk prófi 1962. Friðrika nam heimspeki við Háskóla Íslands og myndlist við Myndlistaskólann í Reykjavík. Hún kenndi við Myndlista- og handíðaskólann 1966-85 og 1995-99 og var deildarstjóri í grafískri hönnun 1986-95.
Þá kenndi hún í LHÍ 1999-
2000.  Friðrika var gerð heiðursfélagi FÍT árið 2003.
Friðrika starfar í listakvennahópnum „Tákn og teikn“.


Gísli Baldvin Björnsson
er fæddur árið 1938 í Reykjavík. Hann var nemandi í Myndlista- og handíðaskóla Íslands 1956-59 í nýrri deild sem fékk hafnið Hagnýt myndlist. Hann stundaði framhaldsnám við Listaakademíuna í Stuttgart, Þýskalandi árin 1959-61.

Gísli stofnaði og stýrði Auglýsingadeild við MHÍ (undanfara deildar „Grafísk hönnun“),
var deildarstjóri 1962-73 og aftur 1976-87. Hann var skólastjóri MHÍ 1973-75, sinnti
kennslu þar og síðan við Listaháskóla Íslands til ársins 2012.
Gísli var lengi í stjórn
FÍT og formaður 1970-71. Hann var stofnandi og í stjórn Myndstefs fyrir hönd teiknara
1991-95 og endurskoðandi 1995-2011.

Hann stofnaði GBB auglýsingastofuna 1961 og vann þar til 1989 með hléum, þar sem skipulag móta, útgáfa, kosningar, stjórnarstörf o.fl.
komu við sögu. Frá 1991-2005 starfaði hann sem „einyrki“ við hönnun, ráðgjöf og kennslu. Síðustu ár hefur hann fengist við eigin myndsköpun. 
Hönnun tímarita, bóka og merkja hafa verið ofarlega á áhugasviði hans.


halla_helgadottir.jpg

Halla Helgadóttir
útskrifaðist sem grafískur hönnuður frá Myndlistar- og handíðaskóla Íslands 1988, sem var fyrsti árgangur sem útskrifaðist með starfsheitið grafískur hönnuður. Eftir útskrift var Halla ráðin til starfa hjá auglýsingastofunni Svona gerum við og síðar á Íslensku auglýsingastofunni. Haustið 1990 stofnaði hún ásamt þrem félögum hönnunarstúdíóið Grafít, sem síðar breyttist í auglýsingastofuna Fíton, en þar starfaði Halla sem grafískur hönnuður og stjórnandi í yfir 20 ár. Hún býr yfir víðtækri reynslu sem yfirhönnuður og skapandi stjórnandi og hefur á starfsferli sínum hlotið fjölda viðurkenninga og verðlauna.

Halla sat í stjórn FÍT frá 1990-1998 og var fulltrúi félagsins í norrænu samstarfi grafískra hönnuða og myndskreyta „Nordiske Tegnere“ og var formaður þeirra samtaka árið 1997.

Halla hefur haldið fyrirlestra og vinnustofur um grafíska hönnun, stöðu og þróun hönnunar. Auk þess hefur hún tekið virkan þátt í umræðu um skapandi greinar og mikilvægi þeirra í samfélagi framtíðarinnar.

Halla er fyrsti framkvæmdastjóri Hönnunarmiðstöðvar Íslands og hefur þar nýtt fjölbreytta reynslu sína sem hönnuður og stjórnandi til uppbyggingar miðstöðvarinnar og helstu verkefna hennar. Má þar nefna HönnunarMars, Hönnunarverðlaun Íslands, Hönnunarsjóð, HA-tímarit um hönnun og arkitektúr, fjölda erlendra verkefna auk öflugs kynningarstarfs. Hönnunarmiðstöð hefur einnig beitt sér fyrir mótun hönnunarstefnu með stjórnvöldum sem er mikilvægt tæki til að efla hlut hönnunar og arkitektúrs í menningu og atvinnulífi á Íslandi.


Halldóra / Dóra Ísleifsdóttir
hefur lengst af starfað sem hönnuður, hugmyndamaður og ráðgjafi. Hún hefur verið prófessor í grafískri hönnun við Listaháskóla Íslands til margra ára, fagstjóri meistaranáms og kennari í hartnær tvo áratugi og þar af séð um inntöku í grafíska hönnun í 12 ár. Dóra hefur kennt námskeiðið Hönnun prentgripa í Háskóla Íslands, á hugvísindasviði í íslensku- og menningardeild, þar sem markmiðið er að auka skilning og samstarf textafólks og hönnuða auk þess að auka gæði í hönnun prentgripa á Íslandi. Auk þess hefur hún starfað sjálfstætt sem hönnuður og ráðgjafi, og við skriftir og þýðingar. Dóra tekur við stöðu prófessors í Háskólanum í Bergen, í Noregi, haustið 2017.

Dóra er með BA í grafískri hönnun og MA í hagnýtri ritstjórn og útgáfu. Áherslur hennar eru skapandi vinna og stjórnun, mörkun og herfræði, merkja- og leturfræði, samhengi mynda og texta, grafísk hönnun og pólitík svo eitthvað sé nefnt. 
Hún hefur sérstakan  

áhuga á leturfræði og útgáfuverkefnum. Þar á meðal má nefna útgáfu- og rannsóknarverkefnið Mæna (tímarit um grafíska hönnun á Íslandi) og verkefnið Varðveisla þar sem unnið var með verk og feril Gísla B. Björnssonar.

Hún hefur tekið þátt í samsýningum og verkefnum á sviði myndlistar og í þverfaglegu samstarfi listamanna svo sem í Eterverkefninu, rekið gallerí (Undir pari), sýningastýrt, tekið þátt í stofnun Gjörningaklúbbsins (Icelandic Love Corporation) og starfaði með honum til ársloka 2001. Hún skrifar líka stundum lagatexta og setur hljómsveitir í búning.

Dóra hefur kennt týpógrafíu, merkjafræði, mörkun, ritstjórnarlega hönnun og leiðbeint í fjölbreyttum MA einstaklingsverkefnum og hópverkefnum auk þess að hanna námsbrautirnar MA í hönnun og BA í grafískri hönnun í samstarfi við aðra akademíska starfsmenn LHÍ. Áherslur hennar í kennslu eru að byggja upp gagnrýna hugsun um það sem er og stundum það sem gæti orðið. Skapandi umbreyting eða design thinking metahönnun. Dóra hefur áhuga á að skoða áhrif grafískrar hönnunar, einkum leturfræði út frá merkingarfræði, efla tök nemenda á aðferðum og hugsunarhætti greinarinnar og styrkja sjálfstæði í umhverfi sem byggist á samstarfi og er hluti af viðskiptalífinu.


Haukur Már Hauksson
er fæddur árið 1967. Hann nam í Bandaríkjunum í Bard College, Annandaleon-Hudson,
NY og Brooks Institute of Photography, Santa Barbara, CA, og lærði grafíska hönnun í Myndlista- og handíðaskóla Íslands.

Haukur Már var í stjórn FÍT 2000-2007. Hann var varaformaður frá árinu 2001 og
formaður frá 2004. Haukur kom á fót og sá um Hönnunarverðlaun FÍT 2001-2007
auk þess sem hann sat í stjórn Art Directors Club of Europe 2004-2007. Hann var
í hópi þeirra sem stofnuðu Hönnunarmiðstöð Íslands, árið 2008, sem fulltrúi FÍT
og sat í stjórn miðstöðvarinnar til ársins 2012, síðasta árið sem stjórnarmaður.

Haukur hefur starfað hjá Auglýsingastofunni Yddu 1996, Nonna og Manna 1996-2004, Auglýsingastofunni Mixu 2004-2006 og
hjá PIPAR/TBWA frá 
árinu 2006 til dagsins í dag.  


Hilmar Sigurðsson
er fæddur árið 1938. Hann stundaði almennt myndlistarnám í Myndlista- og handíðaskólanum 1959-64 og útskrifaðist í fyrsta hópi úr auglýsingadeild skólans.
Fór í framhaldsnám í Listaháskólann í Stuttgart í Þýskalandi (Staatliche Akademie der Bildende Künste) í almennri myndlist, grafískri hönnun og markaðsfræðum 1964-67.

Hilmar kenndi við MHÍ 1967-70 og 1978-81, bæði á kvöldnámskeiðum og
í Auglýsingadeild. 
Hann stofnaði Auglýsingastofuna Argus 1967 og rak hana í
tæp 40 ár. Þar starfaði hann sem hönnuður, texta- og hugmyndasmiður auk þess
að vera stjórnarformaður. 

Hilmar var í stjórn FÍT og formaður þess 1971-74 og einnig í stjórn SÍA (Sambands íslenskra auglýsingastofa) og formaður þar. Hilmar rekur
nú vinnustofu í Hafnarfirði undir nafninu DEHSIGN. Hilmar er höfundur að mörgum þekktum slagorðum og logoum sem lifa í samfélaginu.


Hörður Ágústsson
Hörður var fæddur 1922 og lést árið 2005. Hann stundaði nám við verkfræðideild Háskóla Íslands á árunum 1941-42, við Myndlista- og handíðaskólann 1941-43 og við Konunglega Listaháskólann í Kaupmannahöfn 1945-46. Eftir það var hann við nám
og störf í París á árunum 1947-52.


Hörður var kennari við Myndlistaskólann í Reykjavík 1953-59, við Myndlista- og handíðaskóla Íslands 1962-89 og skólastjóri hans 1968-72. Hann var einn af stofnendum
og ritstjórum tímaritsins Birtings á árunum 1955-68.


Hörður stundaði rannsóknir á sögu íslenskrar húsagerðar frá því snemma á sjöunda áratugnum og ritaði fjölda greina og bóka um ýmsa þætti íslensks byggingar- og

myndlistararfs á innlendum og erlendum vettvangi. Hann átti þátt í stofnun Húsafriðunarnefndar og sat í henni 1970-95. Hann teiknaði
og hafði umsjón með gerð Þjóðveldisbæjarins í Þjórsárdal 1974-77 og var formaður Hins íslenska fornleifafélags 1982-2001.

Hörður var í hópi þekktustu myndlistarmanna landsins. Myndlistarverk hans voru sýnd á fjölda myndlistarsýninga, bæði einkasýningum, samsýningum og yfirlitssýningum, m.a. í Listasafni Íslands 1983 og á Kjarvalsstöðum 2005. Auk þess liggja eftir hann stórvirki á sviði húsagerðarlistar.
Hann hlaut fjölda viðurkenninga fyrir störf sín, var m.a. sæmdur heiðursdoktors-nafnbót frá Háskóla Íslands 1991 og
hlaut Íslensku bókmenntaverðlaunin í flokki fræðirita, 1990 og 1998.


Hörður Lárusson
Hörður er fæddur 1979. Hann lauk námi með BA í grafískri hönnun úr Listaháskóla Íslands árið 2006.
Hann starfaði á Vinnustofu Atla Hilmarssonar 2005-2012, síðan sem hönnunarstjóri/Art Director á Brandenburg auglýsingastofu frá 2012 og starfar þar enn. Samhliða þessu hefur hann unnið verkefni sjálfstætt frá árinu 2000.

Hörður var í stjórn FÍT frá 2005-2013, þar af formaður frá 2007. Hann sat í stjórn Art Directors Club of Europe 2007-2013. Eftir setu í FÍT tók hann sæti í stjórn Hönnunarmiðstöðvar og hefur setið síðan, sem varaformaður frá 2015.
Fyrir HönnunarMars 2015 og 2016 sat hann í stjórn hátíðarinnar.


Kristín Þorkelsdóttir
er fædd 1936. Hún hóf nám í myndlistadeild Myndlista- og handíðaskólans aðeins
15 ára gömul og útskrifaðist þaðan árið 1955. Á sumrin vann Kristín meðfram skólanum
á teiknistofu Sveins Kjarvals. Á þriðja ári bætti hún við sig teiknikennaranámi og varð
þá aðstoðarkennari Sverris Haraldssonar listmálara á kvöldnámskeiðum skólans. 
Kristín stofnaði auglýsingastofu með eiginmanni sínum, Herði Daníelssyni, og fékk
stofan síðar nafnið AUK hf.

Kristín starfaði við grafíska hönnun í áratugi og
er hvað þekktust fyrir hönnun íslensku peningaseðlanna allt frá árinu 1981.

Kristín hóf feril sinn sem vatnslitamálari árið 1984 og hefur einkum málað landslagstengdar myndir með ljóðrænu ívafi og einnig portrettmyndir. Kristín starfar einnig í listahópnum „Tákn og teikn“.


Torfi Jónsson
er fæddur 1935. Hann stundaði nám við Tónlistarskólann og jafnframt því hóf hann nám við Myndlista- og handíðaskólann og lauk prófi þaðan. Torfi dvaldi í Hamborg um fimm ára skeið og lauk prófi frá listaakademíunni þar. Torfi sá um allar auglýsingar fyrir vörumerkin Nivea, Atrix, Baby Fine og Tesa í samvinnu við þýska auglýsingafyrirtækið Bayers í Hamborg. Hann starfaði einnig mikið fyrir Loftleiðir. 

Torfi hefur verið meðlimur í Félagi íslenskra teiknara frá 1963 og hóf kennslu við Auglýsingadeild Myndlista- og handíðaskólann veturinn 1963-64, þá nýkominn frá Þýskalandi. Þar kenndi hann þar til hann varð skólastjóri MHÍ frá 1982-86.

Eftir það kenndi Torfi aðallega leturfræði við Iðnskólann í Reykjavík. Torfi er mikilvirkur kallígrafer og vatnslitamálari og hefur sýnt
verk sín opinberlega.
Torfi starfaði lengi við hönnun glæsilegra bóka svo sem á sérstakri útgáfu á Passíusálmunum. Á meðal merkja
sem Torfi hefur gert má nefna 25 ára afmælis Lýðveldis Íslands.


Guðmundur Oddur Magnússon - Goddur
er fæddur árið 1955. Hann stundaði nám í myndlist við Myndlista- og handíðaskólann 1976-79 bæði við grafík- og nýlistadeild. Hann hóf nám í grafískri hönnun við Emily Carr University of Art & Design í Vancouver, Bresku Kólumbíu í Kanada og útskrifaðist þaðan 1989. Hann stofnaði deild í grafískri hönnun við Myndlistaskólann á Akureyri 1992 og kenndi við þá deild í þrjú ár.

Árið 1995 tók hann við stöðu deildarstjóra grafískrar hönnunar við Myndlista- og handíðaskóla Íslands i þeim tilgangi að kenna grafíska hönnun í tölvuumhverfi.
Hann tók þátt í stofnun og uppbyggingu Listaháskóla Íslands og var fagstjóri í grafískri hönnun frá byrjun þar til hann var skipaður fyrsti prófessor við nýstofnaða hönnunar- og arkitektúrdeild skólans árið 2002, þar sem hann starfar enn. 

Goddur hefur verið sýningastjóri og tekið þátt í sýningarhaldi víða um heim og haldið námskeið og fyrirlestra. Hann hefur stýrt Masters-class námskeiði á Seyðisfirði og situr í stjórn Lunga listalýðháskólans á Seyðisfirði. Hann hefur skrifað fjölda greina um
hönnun og myndlist, og var um tíma myndlistargagnrýnandi hjá Ríkisútvarpinu Rás 2 og Fréttablaðinu. Hann hefur unnið að þáttagerð
um sjónmenntir, Djöflaeyjuna fyrir Ríkissjónvarpið síðan 2011.


Goddur er fyrst og fremst sérfræðingur í myndmálsnotkun og sögu grafískrar hönnunar á Íslandi. Fræðimennska hans snýr að
íslenskum myndmálsarfi.


Þröstur Magnússon
er fæddur 1943. Hann stundaði nám við Myndlista- og handíðaskóla Íslands 1962-65 og við Konstindustriskolan í Gautaborg 1965-67. Þröstur stofnaði, ásamt Hilmari Sigurðssyni, auglýsingastofuna Argus árið 1967 og starfaði þar til ársins 1971 þegar hann hóf rekstur hönnunarstofu undir eigin nafni.

Þröstur hefur komið að fjölbreyttum hönnunarverkefnum m.a. hönnun bóka og bókakápa, en meðal stærri fyrirtækja sem hann vann fyrir má nefna Eimskip, Sambandið og Olíuverslun Íslands hf. Hann vann að margvíslegum verkefnum fyrir Seðlabankann í
meira en þrjátíu ár og er hönnuður íslensku myntarinnar og allnokkurra minnispeninga sem bankinn lét slá á þessu tímabili.

Þröstur var um árabil helsti hönnuður íslenskra frímerkja en eftir hann liggja yfir 200 frímerki frá árinum 1977-2001. Árið 1991 hlaut hann menningarverðlaun DV fyrir hönnun frímerkja og nokkur merkja hans hafa hlotið alþjóðlegar viðurkenningar til að mynda fyrsta sætið í Stamp World Cup 1992, samkeppni um fallegustu frímerki í heimi, og fyrsta sæti í samkeppni um frímerki tengd Kanada; Canadiana Popularity Stamp Poll 1992. Verk Þrastar hafa verið sýnd við ýmis tækifæri og margar af frímerkjateikningum hans eru varðveittar í einkasöfnum víða um heim.